విదేశీ యువతికి సాయం చేసేందుకు ట్రాక్‌పైకి దూకాడు.. వీడియో ఇదిగో!

ప్రస్తుత సమాజంలో ప్రతిఫలం ఆశించకుండా సహాయం చేసేవారు చాలా అరుదుగా కనిపిస్తారు. అలాంటి ఓ మంచి మనసున్న ఓ వ్యక్తి చేసిన పని ఇప్పుడు సోషల్ మీడియాలో అందరి హృదయాలను గెలుచుకుంటోంది. ఓ ఇండోనేషియా యువతికి సహాయం చేసేందుకు ఆయన ఏమాత్రం ఆలోచించకుండా రైల్వే ట్రాక్‌పైకి దూకాడు. ఈ సంఘటనకు సంబంధించిన వీడియో ప్రస్తుతం ఇంటర్నెట్‌లో వైరల్ అవుతోంది.

వివరాల్లోకి వెళితే, @indaha.l అనే ఇండోనేషియా డిజిటల్ క్రియేటర్ ఢిల్లీ రైల్వే స్టేషన్‌లో ఆగి ఉన్న రైలు వద్ద నిల్చుని ఉంది. ఈ క్రమంలో ఆమె కెమెరాను సర్దుకుంటుండగా తన దుపట్టా  రైలుకు, ప్లాట్‌ఫామ్‌కు మధ్య ఉన్న ఖాళీలో పడిపోయింది. ఆమె ఏమి చేయాలో తెలియక అయోమయంలో ఉండగానే, అటుగా వెళ్తున్న ఓ వ్యక్తి వెంటనే స్పందించారు.

మొదట చేత్తో తీయడానికి ప్రయత్నించినా దుపట్టా అందలేదు. దీంతో ఏమాత్రం ఆలస్యం చేయకుండా ట్రాక్‌పైకి దూకి, దుపట్టాను తీసి ఆ యువతికి అందించాడు. ఆ తర్వాత ఆమె సాయం చేయబోయినా సున్నితంగా తిరస్కరించి, ప్లాట్‌ఫామ్‌పైకి ఎక్కాడు. కనీసం ఆమె చెప్పే కృతజ్ఞతల కోసం కూడా ఆగకుండా తన దారిన తాను నిశ్శబ్దంగా వెళ్లిపోయారు.

ఈ ఊహించని సహాయానికి ఆశ్చర్యపోయిన ఆ యువతి ఈ వీడియోను ఇన్‌స్టాగ్రామ్‌లో పోస్ట్ చేస్తూ "ఆయన ట్రాక్‌పైకి దూకుతారని అస్సలు ఊహించలేదు. నిజాయితీగా చెప్పాలంటే నాకు చాలా బాధగా అనిపించింది. ఆయనకు నా కృతజ్ఞతలు" అని రాసుకొచ్చింది. ఈ వీడియోకు ఇప్పటికే 41 మిలియన్లకు పైగా వ్యూస్ వచ్చాయి. నెటిజన్లు ఆయన మంచితనాన్ని ప్రశంసిస్తూ కామెంట్లు పెడుతున్నారు. "ఆయన ఒక హీరోలా నడిచి వెళ్లారు", "ఆ యువతి చేతిని సాయం కోసం కూడా పట్టుకోలేదు, ఆయనే నిజమైన జెంటిల్‌మన్" అంటూ కామెంట్ల వర్షం కురిపిస్తున్నారు.